“საქართველოში ისევ დათბება ტემპერატურა მოიმატებს და..” – ნახეთ უახლოესი დღეების ამინდის პროგნოზი

გარემოს ეროვნული სააგენტოს ამინდის მოკლევადიანი პროგნოზების განყოფილების უფროსი, დოდო გვაზავა გადაცემაში “დილა მშვიდობისა საქართველო” საუბრობს, როგორი ამინდია მოსალოდნელი მიმდინარე კვირის განმავლობაში:– გასულ კვირებში აღინიშნებოდა თოვლი, განსაკუთრებით მაღალმთიან რაიონებში, რაც არქტიკული ცივი ჰაერის მასების შემოჭრით იყო განპირობებული. ამან კი როგორც დაბლობ, ასევე მთიან და მაღალმთიან რაიონებში ჰაერის ტემპერატურის დაკლება გამოიწვია. თოვლი აღინიშნებოდა ხულოს რეგიონში, სადაც საფარმა 50 სანტიმეტრსაც გადააჭარბა.

მიმდინარე კვირის განმავლობაში, გლობალური რუკებიდან ჩანს, რომ ცვლილებები ატმოსფეროში მიმდინარეობს, მაგრამ ამ კვირის განმავლობაში საქართველოს ამინდს სამხრეთიდან გავრცელებული თბილი ჰაერის მასები განაპირობებს. ამიტომ, წინა კვირის მსგავს კატაკლიზმებს არ უნდა ველოდოთ. ტემპერატურა მოიმატებს. თუმცა, ღამის საათებში ჰაერის მინიმალური ტემპერატურა დაბლობში, ვაკეში, მთიან და მაღალმთიან რაიონებში უფრო ცივი იქნება, ვიდრე დღის მაქსიმალური ტემპერატურა.

დედაქალაქში ღამის საათებში ჰაერის მინიმალური ტემპერატურა +5. +8 გრადუსის ფარგლებში, დღის მაქსიმალური ტემპერატურა თვის ბოლომდე +18 გრადუსამდე მოიმატებს. ნოემბრის დასაწყისი კიდევ უფრო მაღალი ტემპერატურითაც შეიძლება აღინიშნოს და ტემპერატურა +20, +22 გრადუსის ფარგლებშია მოსალოდნელი.

აღმოსავლეთ საქართველოში, შიდა ქართლში, თვის ბოლომდე ჰაერის მინიმალური ტემპერატურა შეიძლება -1, -3 გრადუსამდე მერყეობდეს, ქვემო ქართლში 0, -2 გრადუსამდე, უარყოფითი ტემპერატურაა მოსალოდნელი აღმოსავლეთ საქართველოს მთიან და მაღალმთიან რაიონებში. სამცხე-ჯავახეთში -3, -4 გრადუსი, მცხეთა მთიანეთში -5, -7, კახეთის რეგიონში კი ღამის ტემპერატურა პლუსის ფარგლებშია მოსალოდნელი.

თვის ბოლომდე მდგრადი ამინდებია მოსალოდნელი, ტემპერატურის მომატებით.